Dan Mariner la “Buorgulvisstáda” aktijvuodan barggam birrusin gávtse máno motijvaj suodjalusá hiejteduvvam girddestasjåvnås Bådådjon. Dan Marinera barggo tjalmostahttá suodjalusá infrastruktuvrraj mij la vijddát ásaduvvam luonndoduobddágij, vádtsemmieres stuorra stádas moadda viesádij, ja tjalmostahttá ásadusá sihkarasstemij ja tjiegadibmáj. Ambisjåvnnå bargujn la gatjálvisájt buktet ekspropriasjåvnnåj ednamijs suodjalusá dåjmajda ja infrastruktuvrraj, ja gåktu globála sihkarvuodapolitihkka Hierggenjárga topografijjav vájkkut. Vijddásappot guoradallá nasjåvnålasj stáhtaj bæjválasj avtastallamav. Dát la sierraláhkáj ájggeguovddel ájgen gånnå nasjåvnålasj oaggásvuohta l tjalmostuvvam, målsudahkes globála politihka diehti. Le gus álmmuga berustibme vaddet almulasj åbmudagájt tjiegadum suodjalusdåjmajda? Ja le gus suodjalusá infrastruktuvrra, lahka viesádij årromguovlojn, vádá majt bájkálasj viesáda vierttiji dåhkkidit bisodittjat tjielgga rijkkarájájt?

Dan Mariner årru Bådådjon, ja la brihtalasj dokumentárragåvvididdje. Barggá Europav miehtáj ja la tjehpudahka redaksjåvnålasj gåvvidimen, majt dåbdos rijkajgasskasasj magasijnaj ja publikasjåvnåj åvdås buvtat. Marinerin la sjávo, metåvdålasj lahkanibme gåvvidibmáj, mij la barggovuohke dokumentárragåvvidimoahpos Newport University, Stuorrabritannan, - institusjåvnnå mij la rijkkagasskasattjat rámpoduvvam. Danna ietjas tjehpudagáv bájnnoanalogijjalasj filmmateknihkaj ja sosiála váksjoma hárráj hábbmi. Suv dárkkel tjalmostahttem detáljajda, ja tjierggis vuojnojn, tjalmostahttá dilijda majt iehtjáda e ájtsa. Båhtusin li gåvå ma motijvav vuosedi duodalattjat ja geldulasj vuoge milta. Dan aj barggá guhkesájggásasj dokumentárraprosjevtaj ma tjalmostahtti tiemájt globála sihkarvuoda birra ja tiemá almasj luonndovalidime birra. Suv bargo li vuoseduvvam Stuorrabritannan, USA:n ja Vuonan, ja li aj vuosedum moatten buoremus gåvvåoassásijn, degu IGNANT, BJP ja Adobe. Duodden gåvvidibmáj jådet Dan NŌUA Bådådjon, ietjas áhkáta ja gåvvididdjijn Marianne Bjørnmyra siegen. NŌUA la dájddainstitusjåvnnå mij åvdet gåvvidimev ájggásasj dájddan.