Nuppát væráltdoaro rájes la sivijlla ja suodjalusá girddesalljo læhkám guovdátjin stáda åvddånahttemin. Tjoahkkáj li dåjma dájn bájkijn birrusin lahkev Hierggenjárgas válldám adnuj. Sæmmi båttå li dá guovlo læhkám dahppot stáda viesádijda ruvva gålmmå buolva. Dajnas de ælla moattes gudi udnásj Bådådjon årru gudi dåbddi "buorgulvisstádav" Hierggenjárgav. Duodden girddesalljuj ja NATO doarrogirddebássaj, la danna tjáppa luonndo ja viessomsaje moadda ruoppsislisstaslájajda ja árvvogis luonndoslájajda. E gávnnu moadda almulasj subttsasa ma li duobddágij tjanádum. Ij la heva giehtodum luondo ja duobddágij birra, jut dát la bádurlåttij sæjvvomsadje, láttakjiekkij birra, boatsojguohtomguovlo, jut dánna lij kultuvrraduobddák 39 båndorsijdajda ja jur danna li luonndoiellemguovlo strádduj.

Jagen 2029, gå udnásj girdádahka hiejteduvvá, de dát sieldes stuorra guovllo, mij moadda buolva la læhkám buorgulvissan, vas suohkana viesádijda sadjihin sjaddá. Gåktu álmmuga berustimev ja æjggumdåbdov ådå stádaguovlluj ásadit, gå ij aktak duobddágijda besa? Gåktu boahtteájggevuojno ja niego ásaduvvi dakkir guovlluj mav ep buoragit dåbdå, gånnå ælla heva aktisasj mujtto vuododuvvam?