Ådå stádaguovllo Hierggenjárgan la edna infrastruktuvrra; dårvvobájke, girddesejvudagá, terminállaviesáda ja vuogádagá. Gåktu galggi dá ressursa doajmmat premissan ådå stádaguovlo åvddånahttemij, ja ájggomusá ådåájggásasj ja guoddelis ådå stádaguovlluj, dálkádakgássaj luojttalime dagi ja sirkulær ja ådåsisadnem birrasijn?

Garra Bådåddjo vuodo l mijá vuojnno ábnnasijda ja materiálajda; teknihkalasj ja estetihkalasj máhtukvuoda ja kvalitehta. Udnásj gållådibme ja lineær økonomijja la vájkkudam vuojnov materiálajda. Mij gajkkop ja biggip, váni ájádallamis materiálaj histåvråv; buvtadimev, anov ja bálkestibme ja ådåsisdahkam. 

Jus galggá rievddat sebrudahkaj binná dálkádakgássaj luojttalimijn, de gájbbet stuoráp diedulasjvuodav materiálaano birra. Jus galggap binnedit resurssaanov de hæhttup ådåsisadnet tsiekkadusájt, biggimábnnasijt, ásfáltav ja betåŋŋav. 

Garra Bådåddjo sierraláhkáj tjalmostahttá betoaŋŋaj ja makkir roalla dán materiálan la konstruksjåvnån ja ådåsisadnem arkitektuvras ja identitehtas Bådådjo stádan.

Sverre Gullesen gåhtjoduváj dahkat sierra vuosádusáv “Strategijja betåŋŋajn” (Strategier i betong) Garra Bådåddjo aktijvuodan. Aktan Gullesena betoaŋŋainstallasjåvnåj vuoseduvvin gåvå Erling Viksjøa bargos betåŋŋajn. 

Duodden Gullesena ja Viksjøa bargojda vuoseduvvin gåvå ikåvnålasj betoaŋŋatsiekkadusájs Bådådjon, ja udnásj girdádagá biggimis.  

Sihke åvddål ja madi vuosádus ásaduváj, ásaduvvin moadda dáhpádusá tjalmostahtátjit vuosádusáv, ja vuosádusá ulmev.